ҚР Өнеркәсіп және құрылыс министрлігінің хабарлауынша, мұндай теңдессіз кен орнын Қарағанды геологтары ашқан, деп жазады inbusiness.kz сайты.
Анықталған орын болашақта Қазақстанды сирек жер элементтерінің қоры бойынша әлемде жетекші орынға шығаруы ықтимал.
"Центргеолсемка" ЖШС жер қойнауын геологиялық барлаудың 2022-2024 жылдарға арналған мемлекеттік бағдарламасы аясында Құйрықтыкөл учаскесінде шамамен миллион тоннаны құрайтын сирек жер металдарының үлкен ресурстары бар бірнеше перспективалы аймақты анықтаған.
– Құйрықтыкөл учаскесі Астанадан оңтүстік-шығысқа қарай 300 шақырым жерде Қарағанды облысы, Қарқаралы ауданынан солтүстік-шығысқа қарай 100 шақырым жерде орналасқан. Геологиялық тұрғыдан Құйрықтыкөл учаскесінің кенді жыныстары кейінірек магмалық процестердің әсерінен өзгерген сөнген жанартаулар мен олардың әрекет өнімдерінен тұратын ежелгі жанартаулық құрылымды білдіреді.
Кен жайылу шкаласы бойынша ең перспективалы аудандар – Ырғыз және Дос 2, мұнда сирек жер элементтерінің жалпы мөлшері 0,1%-дан асады, жекелеген үлгілерде 0,25%-ға және одан да жоғары дәрежеге жетеді. Керн сынамаларын алу және сирек жер элементтерін сандық анықтау нәтижелері бойынша жүргізілген Ырғыз ауданындағы бөлінген блоктың қорларының алдын ала есебі орташа мөлшері 0,1%-дан астам 800 мың тоннаға жуық металдардың барын көрсетті. Оның үстіне ұңғылар кеннен шықпаған, – деп жазылған министрлік хабарламасында.
Жобадағы сирек жер элементтерінің аналитикалық зерттеулерінің көлемі шектеулі болғандықтан, бұл нысанның маңыздылығын болжаған "Центргеолсемка" ЖШС басшылығы сирек жер элементтерін сандық анықтаудың едәуір бөлігін өз қаражаты есебінен жүргізуге шешім қабылдап отыр, бұл қорларды алдын ала бағалауға мүмкіндік берген.
Барлық қолда бар тарихи материалдар мен геологиялық барлау жұмыстарының мәліметтерін талдаған соң "Жаңа Қазақстан" атты өте үлкен болжамды ауданы қосымша анықталып, алдын ала бағаланды.
Ол – ел дамуының жаңа кезеңі құрметіне аталған және оңтүстік пен батыста анықталған кенді қабаттардың жалғасы. Жаңа Қазақстан – Құйрықтыкөл учаскесін түгелдей дерлік қамтиды және барлық геологиялық алғышарт тұрғысынан өте перспективалы аудан.
– Жаңа Қазақстан ауданының 300 метр тереңдіктегі сирек жер металдарының жалпы болжамды қоры 20 млн тоннадан асады, сирек жер элементтерінің орташа мөлшері шамамен 700 г/т құрайды. Қазақстанда сирек жерді кен жайылудың мұндай түрінің аналогтары жоқ, бұл оны жаңа өнеркәсіптік типке жатқызуға мүмкіндік береді. Анықталған сирек жер кен орындары мен перспективалық учаскелер, егер одан әрі расталса, болашақта Қазақстанды сирек жер элементтерінің қоры бойынша әлемде жетекші орынға шығаруы мүмкін, бұл сирек жер металдарының жоғары технологиялық саласын қарқынды дамытуға мүмкіндік береді, – деп ақпарат таратты ведомство.
Бұған дейін Қазақстанға жақын елден ірі мұнай кен орны табылғанын да жазған болатынбыз.
