АҚШ Президенті Дональд Трамп шетелден әкелінетін барлық тауар түріне баж салығын енгізеді. Бұл туралы ол сәрсенбі күні Ақ үйде өткен баспасөз мәслихатында айтты, деп хабарлайды inbusiness.kz сайты.
АҚШ әкімшілігі кедендік баж салығын енгізетін 185 мемлекеттің тізімі бар ақпарат Трамптың Truth Social әлеуметтік желісіндегі парақшасында жарияланды.
Базалық тариф мөлшері 10 пайызға тең. Бірақ та, кейбір мемлекеттер үшін оның көлемі жоғары. Мысалы, Қытайдан келген импорттық тауарларға баж салығы – 34 пайыз, Еуроодақ елдеріне – 20 пайыз, Швейцария – 31 пайыз, Ұлыбритания – 10 пайыз, Израиль – 17 пайыз, Қазақстан – 27 пайызға тең. Вьетнам (46 пайыз), Камбоджа (49 пайыз), Лаос (48 пайыз) үшін импорттық алым мөлшері ең жоғары.
Тізімде Ресей туралы ештеңе айтылмаған. Бұдан бөлек мәліметте Мексика, Иран, Канада және Беларусь елдері де кездеспейді. Вашингтон Украинадан келген тауарларға 10 пайыз көлемінде баж салығын енгізу туралы шешім қабылдады.
Молдова (31 пайыз) мен Қазақстаннан басқа посткеңестік елдердің басым көпшілігіне 10 пайыздық мөлшер енгізілген. Мәселен, Армения, Әзербайжан, Грузия, Өзбекстан, Түрікменстан, Қырғызстан, Тәжікстан елдері үшін алым – 10 пайыз.
АҚШ басшысы жеңіл көліктер, жүк көліктері мен автобөлшектерді импорттауға 25 пайыздық баж салығын енгізу туралы бұйрыққа қол қойды.
Ол баж салығын енгізуді "экономикалық тәуелсіздік декларациясы" деп отыр.
10 пайыздық базалық баж салығын енгізу бұйрығы 5 сәуірден бастап күшіне енеді.
