Отырыста Kaspi.kz басшысы және негізін қалаушылардың бірі Михаил Ломтадзе мемлекеттік органдармен бірлескен табысты жұмыстың нәтижелері туралы айтты, деп хабарлайды inbusiness.kz сайты.
"Kaspi.kz миссиясы – қазақстандықтардың өмірін жақсартатын инновациялық сервистерді жасау. Осы миссия аясында біз мемлекеттік органдармен бірге мемлекеттік қызметтерді азаматтар үшін барынша қолжетімді жасаудамыз. Біздің ең үлкен жетістіктеріміздің бірі – Kaspi.kz қосымшасындағы "Мемлекеттік қызметтер" сервисіне ай сайын 10 миллионнан астам адам кіреді", – деді Михаил Ломтадзе.
Компания басшысы бұл – командалық жұмыстың нәтижесі екенін атап өтті. Әрбір сервис Kaspi.kz және Цифрландыру министрлігі, "Ұлттық ақпараттық технологиялар" АҚ, Қаржы министрлігі, Ішкі істер министрлігі және басқа да мемлекеттік ведомстволармен бірлесе әзірленеді. "Біз бір-бірімізден үнемі үйренеміз, – деді Михаил. – Біз өз білімімізбен және технологияларымызбен бөлісеміз және мемлекеттік қызметтер саласында жұмыс істейтін командалардан өзіміз де үйренеміз. Бұл – елдің болашағы тұрғысынан алғанда үлкен актив".
Kaspi.kz қосымшасындағы ең танымал мемлекеттік сервистер – цифрлық құжаттар, жүргізуші куәлігін ауыстыру, автокөлікті қайта рәсімдеу, баланың туу туралы куәлігі, анықтамалар. Кәсіпкерлер смартфон экранынан тікелей жеке кәсіпкерлікті тіркеп, активтері мен міндеттемелері туралы декларация тапсырып, салық төлейді. Бұл – қосымшада ұсынылған мемлекеттік қызметтердің тек бір бөлігі ғана.
"Мен көп сапарлаймын, бүкіл әлем бойынша инвесторлармен сөйлесемін және Қазақстанның жетістіктері туралы айтып жүремін. Осы сервистер туралы маған: "Мұндай табысты мысалдар басқа еш жерде жоқ" – дейді. Мүмкін, біз бұл туралы көбірек айтуымыз керек шығар. Қазақстан – мемлекеттік қызметтердің дамуы тұрғысынан нағыз революциялық мысал", – деп атап өтті Михаил Ломтадзе.
Kaspi.kz басшысының баяндамасында әсіресе салық бойынша статистика әсерлі болды.
2024 жылы 7,5 миллион адам Kaspi.kz арқылы салық төледі. Сервис арқылы жеке тұлғалар мен жеке кәсіпкерлер төлеген салық көлемі жыл ішінде шамамен 2,2 трлн теңгені құрады. Бұл 2023 жылмен салыстырғанда 34%-ға көп.
"Біз өте қарапайым динамиканы байқап отырмыз, – деді Михаил Ломтадзе. – Егер сервис ыңғайлы болса, егер негізгі есептеулерді өзіміз жасасақ, адамдар мен бизнес онлайн-сервистерге қосылып, салық төлейді. Ыңғайлы онлайн-сервистер мен нәтиже арасында бір-біріне пропорционалды тәуелділік бар".
Kaspi.kz ай сайын 500 мың клиентінен компания өнімдері мен сервистері туралы пікірлерін сұрайды. Әрбір 10 адамның 8-9-ы Kaspi.kz қосымшасындағы мемлекеттік қызметтерге ең жоғары баға береді. Олардың ішінде декларация толтыру және салық төлеу сияқты қажетті, бірақ халық арасында әдетте аса ұнамды саналмайтын рәсімдер де бар.
Жаңа сервистерге ең қатты қуанатындар – кәсіпкерлер. Kaspi.kz арқылы сервис іске қосылған уақыттан бері 1 миллионнан астам ЖК тіркелді. 1 миллион адам 250-нысан бойынша, тағы 281 мың адам 910-нысан бойынша декларация тапсырды. Тек 2024 жылы ғана бизнес бюджетке 1,7 трлн теңгеден астам салық төледі.
"Біздің клиенттеріміз, кәсіпкерлер, бізден жаңа сервистерді қосуды, басқа салықтық құжаттарды да онлайн тапсыру мүмкіндігін жасауды сұрайды. Бизнестің негізгі жанды жері, біздің шешіп жатқан негізгі мәселеміз – қателеспеуге көмектесу. Өйткені кәсіпкерлер қате жіберуден қатты қорқады", – деп түсіндірді Kaspi.kz басшысы.
Михаил Ломтадзенің пікірінше, мемлекет нарық қатысушыларымен бірлесіп, Қазақстанда бизнесті дамытудың барлық кезеңдерінде сүйемелдейтін өзара байланысты сервистер жүйесін қалыптастырып жатыр.
"Алдымен кәсіпкер ЖК тіркейді, себебі ол қолма-қол емес төлемдерді қабылдауға ниетті. Содан соң ол электрондық коммерциямен айналыса бастайды, бүкіл ел аумағында сауда жасайды. Оның бизнесі өсіп, жұмыс орындарын ашып, декларациялар тапсырып, салық төлей бастайды. Мұның бәрі кешенді түрде жұмыс істейді. Нарықтағы барлық ойыншылар – технологиялық компаниялар, финтехтер, банктер – мемлекеттік органдармен бірлесіп онлайн-сервистер жүйесін дамытқанда, кәсіпкерлер де дами түседі. Бұл ел үшін, бизнестің ашықтығы үшін үлкен нәтиже болады", – деп санайды Михаил Ломтадзе.
Спикер келтірген статистика бұл қалай жұмыс істейтінін айқын көрсетеді. Көк сызық – қолма-қол емес төлемдер, қызыл сызық – салықтар. Қолма-қол емес төлемдер неғұрлым көп болса, бизнестің ашықтығы мен бюджетке түсетін түсімдер де соғұрлым артады.
Сонымен қатар, Михаил Ломтадзе отырысқа қатысушылардың назарын мынаған аударды, мұндағы жетістіктерге жуырда ғана қол жетті, ал оң динамиканы кері бұру оңай:
"Динамика өте нәзік. Мұның бәрін кері бұру – өте оңай. Адамдар мен бизнестің қайтадан қолма-қол төлемге оралуы қиын емес, әсіресе жетістіктеріміздің жақында ғана болғанын ескерсек. Біз өз тарапымыздан инновациялық сервистер жасауды, тәжірибемізбен, технологияларымызбен бөлісуді, адамдардың өмірі мен бизнестің жұмысын тиімдірек етуді жалғастыруға дайынбыз".
"Бізге осы ортақ жетістіктерімізді бірге сақтап, бизнестің әрі қарай өсіп, елдің дамуына үлес қосып, жұмыс орындарын құруына мүмкіндік бергеніміз дұрыс болар еді", – деп түйіндеді Kaspi.kz басшысы.
Премьер-министр Олжас Бектенов Үкімет ары қарай да цифрландыруды қолдайтынын айтты.
"Расында да, Kaspi-дің цифрландыру, онлайн-сервистерді ұсыну бағытындағы жетістіктері әсерлі! Мемлекет тарапынан біз мемлекеттік қызметтерді ары қарай цифрландыруды міндетті түрде қолдаймыз".
